મારાં વિશે થોડુંક..

હું સ્નેહા પટેલ ‘અક્ષિતારક’ અમદાવાદમાં રહું છું ,

હું એક પ્રોફેશનલ લેખિકા છું.

1. ફૂલછાબ દૈનિક પેપર, રાજકોટમાં ‘નવરાશની પળ’
2. ખેતીની વાત, માસિક મેગેઝિન, રાજકોટમાં ‘મારી હયાતી તારી આસ – પાસ
3. શ્રી ખોડલધામ સ્મૃતિ મેગેઝિન, રાજકોટમાં ‘આચમન’
4.  પટેલ સુવાસ, અમદાવાદ
5. ગુજરાત ગાર્ડીયન દૈનિક પેપર, સુરતમાં ‘સ્માઈલ પ્લીઝ”

મારી રેગ્યુલર કોલમ છે.

આ સિવાય મારા છૂટાછવાયા લેખ દિવ્ય ભાસ્કર પેપરમાં ‘મધુરિમા’પૂર્તિમાં, ફીલિંગ્સ મેગેઝિન – બરોડા, ઘરશાળા મેગેઝિન- અમદાવાદ, ગંધીનગર સમાચાર , મોઢવણિક મંડળ મેગેઝિન, પાંચમી દિશા મેગેઝિન – બરોડા, કપ્તાન મેગેઝિન, અરસ-પરસ મેગેઝિન, લોકપડકાર સાપ્તાહિકી પેપર-વલસાડ વગેરેમાં છ્પાતા રહે છે.

વિચારવું, અનુભવવું અને લખવું આ જ મારી જીંદગી છે..શબ્દો મને અનહદ આકર્ષે છે. ઉપરવાળાએ  સંવેદનશીલ હ્રદયની સાથે સાથે એ તીવ્ર અનુભૂતિને સરળતાની ભાષામાં સાહજીક રીતે કાગળ પર ઉતારવાનું અલભ્ય વરદાન આપ્યું છે એ માટે હું એની ખૂબ ખૂબ આભારી છું..થેન્કયુ ગોડ.  🙂

મારા વિશે બે જ લાઇનનો પરિચય બહુ થઈ પડે આમ તો કે,
‘નદી જેવી બિન્દાસ વહુ છુ
હા પણ
વળાંકોને અનુરૂપ થઈ જઊં છું..’

ડીડી-૧ પર આવતા કાર્યક્રમ ‘કવિ કહે છે’માં ગુજરાતી સાહિત્યના  પ્રખ્યાત કવિ શ્રી તુષાર શુક્લ અને ધૂની માંડલિયા જેવા દિગ્ગજો જોડે કાવ્યપઠન કરવાનો અવિસ્મરણીય લ્હાવો પણ મેળવેલો છે.

મારા માટે લખાણની પ્રક્રિયા એટલે અભિવ્યક્તિ સાથે ખુદને  મઠારવાનો, જાત સામે જાતને મૂકીને એનું અવલોકન કરવાનો અદભુત લ્હાવો !

લખવાની ઘેલછાએ મને બહુ બધું વિચારતા-સમજતા શીખવ્યું છે. જીવનનાં સારા-નરસા પાસાઓને ધ્યાનથી જોતા અને સ્થિતીઓને સંભાળતા શીખવ્યું છે. લોકો મારું લખાણ વાંચે, સમજે એના કરતાં આ પ્રક્રિયા દ્વારા હું મારી જાતને વધારે સારી રીતે સમજુ એનો વધુ મોહ છે એવું કહીશ તો કોઇ અતિશયોક્તિ નથી.

મારા લખાણે નીડરતાથી સતતપણે પ્રામાણિક રહેતાં શીખવ્યું છે.આ લખીને વ્યક્ત થવાની જાહોજલાલી એવી મદમસ્ત છે ને કે ના પૂછો વાત !

જ્યારે જ્યારે લખવા તરફ વળું છું ને પછી એમાં ડૂબી જઉં છું ત્યારે ત્યારે એમ થાય કે, ‘ મારો તો જન્મ જ લખવા માટે થયો છે ને જીવનના બીજા બધા કામ મારે માટે તદ્દન અર્થહીન છે.’

ટૂંકમાં, લખતી વેળાનો નશો મને થોડો સમય બીજા કામ માટે પાર્ટટાઇમની આળસુ બનાવી દે છે ને એના નશામાંથી બહાર નીકળવા મારે પ્રયાસ કરવા પડે છે. આમ જ બસ..રોજ નવું નવું શીખું છુ અને કલમને ધાર કાઢી કાઢીને લખવાનો પ્રયત્ન કરું છું..શબ્દોનો નિર્દોષ નશો કરું છું.

સ્નેહા પટેલ – અક્ષિતારક