સર્જન – સર્જક – ભાવક


http://phulchhab.janmabhoominewspapers.com/purti.aspx

ફૂલછાબ પેપર > નવરાશની પળ કોલમ > 11-07-2012 નો લેખ

 

મણકો હું, પણ હું માળાની બ્હાર ઊભો છું,

સાચ્ચું કહું તો સરવાળાની બ્હાર ઊભો છું.

સાંજ કનેથી રંગ ઉછીના લઈને જીવ્યો,

અંધારાની, અજવાળાની બ્હાર ઊભો છું.

-અંકિત ત્રિવેદી.

 

અવની..એક લાગણીશીલ,પ્રેમાળ સ્ત્રી.ઓફિસમાંથી થોડો થોડો સમય મળતાં એ વચ્ચે વચ્ચે પોતાનો વાંચનનો શોખ પૂરો કરવા નેટ પર થોડું સર્ફિંગ કરી લેતી..એમાં ને એમાં છેલ્લાં બે – ત્રણ મહિનાથી એને ફેસબુકનો ચસ્કો લાગેલો. એનું ‘વોટ્સ ઓન યોર માઈન્ડ’ એને બહુ જ ગમતું..આપોઆપ એનાથી બેચાર લાઈન એમાં લખાઇ જતી. ધીમે ધીમે એને સમજાયું કે એનામાં પોતાના વિચારો એક્સપ્રેસ કરવાની સારી શક્તિ છે..અને ફેસબુકમાં એના નવા નવા બનતા મિત્રો એને લાઈક અને કોમેન્ટસથી સારી એવી પ્રેરણા આપતા હતાં.

એક દિવસ ચેટમાં એક આધેડ વયના મિત્ર આવ્યાં. બહુ જ સુંદર અને શાલીનતાથી વાત કરતાં હતાં. અવનીને એની વર્તણૂક બહુ જ આકર્ષી ગઈ. એણે એ મિત્રનો પ્રોફ્રાઈલ ચેક કર્યો તો ખબર પડી કે એ તો બહુ જ સારા લેખક – કવિ છે. સુંદર મજાની રોમાન્ટીક ગઝલો..પ્રેરણા આપતા અદભુત લેખો..અહાહા.કેટલો ઠરેલ અને સમજુ માણસ તો પણ મારી સાથે સાવ આમ સરળતાથી વાત કરે છે..કેવી નવાઇ.!

પછી તો બેય જણા રોજ રોજ કલાકો ના કલાકો ચેટ કરવા લાગ્યાં. એ વિદ્વાન મિત્ર અવનીને નવું નવું લખવા માટે માર્ગદર્શન અને પ્રોત્સાહન આપવા લાગ્યાં.

એકાદ મહિનાના ગાળા દરમ્યાન જ અવની પોતાના લખાણમાં સારો એવો ચેન્જ અનુભવી શકી. પેલા વિદ્વાન કવિમિત્રએ ધીમે ધીમે બહુ જ હોંશિયારીથી પોતાના શબ્દો પરની અદભુત પકડ દ્વારા મીઠી મીઠી વાતો કરી કરીને અવનીને પોતાની ટેવ પાડી દીધી હતી..જાણે એક સાયકોલોજીકલ ગેમ…વળી એ બહુ મોટા ગજાનો માણસ હતો એટલે અવનીને પોતાના લખાણને આગળ વધારવા માટે એક સ્કોપ પણ લાગતો હતો.નેટ પરની દોસ્તી ધીમે ધીમે મોબાઈલકાળમાં પ્રવેશી.

 

પછી તો જેમ ચાલતું આવ્યં છે એમ જ..મોબાઇલમાંથી ઇચ્છાઓ ધીમેથી વાસતવિક દુનિયામાં સરકવા લાગી..બેય જણાએ કોફી શૉપમાં મળવાનું નક્કી કર્યું. અવની સમય કરતાં થોડી વહેલી જ એ જગ્યાએ પહોંચી ગઈ પણ પેલા વિદ્વાન મિત્ર તો ખાસ્સા કલાકેક રાહ જોવડાવીને આવ્યાં. ઠીક છે..મોટા માણસોને સમયની મારામારી હોય એ સમજી શકાય એવી વાત છે કહીને અકળાયેલી અવનીએ મન મનાવી લીધું.

રહી રહીને અવનીને આ વ્યક્તિ એણે જે રીતની પર્સનાલીટી એના પ્રોફાઈલ પરથી ધારેલી એના કરતા સાવ અલગ જ લાગતો હતો. ના એના કપડાંના ઠેકાણા કે ના વાળના..કદાચ છેલ્લાં અઠવાડીઆથી શૅવ પણ નહી કર્યુ હોય..એકદમ લધરો..ક્યારેય આવા વ્યક્તિ જોડે એ આમ જાહેરમાં નહોતી બેઠી એટલે એને થોડો સંકોચ થવા લાગ્યો. એવામાં એ વિદ્વાન અને આધેડ મિત્રએ અવનીના ટેબલ પર રહેલા નાજુક હાથ પર પોતાનો બરછટ હાથ મૂકી દીધો અને હળવેથી પંપાળવા લાગ્યો અને ..ટેબલ નીચેથી એનો પગ અવનીના પગને સ્પર્શવા લાગ્યો..હવે અવનીને ઝાટકો લાગ્યો..આ માણસ એને શું સમજી રહ્યો હતો…એ એકદમ અકળાઈ ગઈ..એનું મોઢું ગુસ્સાથી લાલચોળ થઈ ગયું.

‘તમે આ શું કરી રહ્યાં છો…આઈ એમ નોટ કમફ્રેટબલ..પ્લીઝ.’

વિદ્વાન મિત્રએ પોતાનો હાથ ખસેડી લીધો..

‘અરે..પણ મેં ક્યાં  કઈં કર્યુ છે ..આ તો એક મિત્રતાપૂર્ણ હરકત હતી .બસ..હા તો તમે તમારી લખેલી કવિતાઓ લાવ્યાં છો..બતાવો મને…આપણે એને મઠારીએ..મને વિશ્વાસ છે કે એ કોઇ સારા સાહિત્યિક મેગેઝીનમાં જરુરથી છપાશે..’

અવનીને એક પળ લાગ્યું કે કદાચ પોતે વધારે વિચારી રહી છે..આ મિત્ર નિર્દોષ પણ હોય..બાકી એનું લખાણ  તો કેટ્લું સરળ અને નિખાલસ..આ તો ઇશ્વરથી ડરનારો ભલો ભૉળો માનવી છે ‘

આમ વિચારીને એણે પોતાની ડાયરી બહાર કાઢી.

પેલા મિત્રએ એ વાંચવાનો ડોળ કરતાં  કરતાંફરીથી શારિરીક અડપલાં ચાલુ કર્યા..

હવે અવની એકદમ શ્યોર થઈ ગઈ કે આ એનો વ્હેમ  નહી હકીક્ત જ હતી.

‘સ્ટોપ ધીસ ઓલ..આઈ ડોન્ટ લાઈક ઈટ..તમે સમજો છો શું મને..?’

‘જુઓ અવની…આમ એકદમ નેરો માઈન્ડેડ રહેશો તો તમે આ ફીલ્ડમાં આગળ આવી રહ્યાં. તમારે થૉડો કોમ્પ્રોમાઈઝ તો કરવો જ પડશે..તો મારી જોડે એ કરવામાં શું ખોટું છે. હું તમને પ્રસિધ્ધીની  ટોચ પર લઈ જઈશ..’

અને એણે પોતાના હાથની પકડ અવનીના હાથ પર વધારી..

‘સોરી, મારે આવી સસ્તી પ્રસિધ્ધી નથી જોઇતી ‘ અને પોતાનો હાથ ઝાટકો મારીને છોડાવી લીધો..

‘અવની..તમે ભણેલા ગણેલા છો..તમારી મરજીથી તમે મને મળવા રાજી થયા છો..પછી હવે આવા નાટક રહેવા દો..અને પછી થોડા અભદ્ર શબ્દોની લ્હાણી કરીને અણછાજતી માંગણી કરી..

અવની એક ઝાટકે ત્યાંથી ઉભી થઈને એ કોફી શૉપની બહાર નીકળી ગઈ..આખા રસ્તે વિચારતી રહી..સરસ મજાનું પોઝીટીવ લખાણ લખતો માણસ અંદરથી સાવ આવા સ્વભાવનો કેમનો હોઇ શકે..પોતે તો માણસોને કેટલા સારી રીતે ઓળખી શકે છે આમાં કેમ થાપ ખાઈ ગઈ..થૉડો વિચાર કરતાં એને ખ્યાલ આવ્યો કે  એ એ લેખકના લખાણથી, અદભુત શબ્દો- અઢળક જ્ઞાનથી અભિભૂત થઈ ગયેલી અને એણે સર્જનને જ સર્જક માનીને મનોમન એની એક મહાન વ્યક્તિ તરીકે કલ્પના કરી દીધી હતી. જે હકીકતથી સાવ જ વેગળું હતું એથી આવી ભૂલ થઈ ગઈ.. નેટની ચકાચોંધમાં કાચને પણ હીરો બનાવી દેવાની અદભુત તાકાત છે. આવી શારિરીક અને માનસિક યંત્રણાથી બચવા ભવિષ્યમાં આવી ભૂલ ક્યારેય નહી કરે.

અનબીટેબલ :  Life is not a rehearsal. Each day is a new show. no repeat, no rewind, no retake..Perform carefully.

unbeatable – 21


ઘણી વાર જિંદગીમાં લોકોની ઇર્ષ્યા અને અવિશ્વાસથી હું હાંફી છું,

ત્યાં બીજા દિવસે વિશ્વાસ – માસૂમિયતનો સૂર્યોદય લઈને જિંદગી મને પાછી મળે છે.

અને જ્યારે પણ કોઇ માણસમાં આવું ભોળપણ – નિ:સ્વાર્થપણું (જેને બુદ્ધીવાદી લોકો મૂર્ખતામાં ખપાવે છે..અને મને એમની એ બુદ્ધિમતા પર દયા આવે છે…) મને ભટકાય છે..ત્યારે ત્યારે મન થઈ જાય છે કહેવાનું..’જિદગી તું બહુ જ સુંદર છે…હું તને અનહદ ચાહુ છું..આ પૃથ્વી વસતા લોકોમાં હજુ વિશ્વાસ મૂકવાનું મારામાં સામર્થ્ય છે અને મને એનો ગર્વ છે !

-સ્નેહા પટેલ