હું તો આવો જ છું…

હું તો આવો જ છું..

તું મને ચાહે છે ને…
તો હું જેવો છું, તેવો જ મને સ્વીકાર !
મારી ૧૬,૧૦૮ રાણીઓ,
મને વ્હાલ કરતી અઢળક ગોપીઓ,
મારા કરતાં પણ  પહેલાં
લોકો  જેનું નામ લોકો બોલે છે
એવી મારી વ્હાલુડી રાધા..
મારી સ્નેહાળ, સર્વ-શ્રેષ્ઠ સખી દ્રૌપદી..
મારા માટે ઝેરનો પ્યાલો ગટગટાવી જનાર સીધી સાદી મીરા..
મારી પટરાણી રુકમણી..
આવી તો કેટકેટલી માનુનીઓના મનમાં હું વસેલો છું !
આ બધાના પ્રેમપાશમાં અવશપણે બંધાયેલો
હું તો આવો જ છું,
મને મારા આ બંધનો સાથે જ  સ્વીકાર !

બની શકે ઘણી વાર તને હું શુષ્ક અને જડ લાગીશ,
તો વળતી જ પળે હું તને લાગણીભીનો લાગીશ.
બધુંય વિચારવાનું છોડી મને મળ..
કારણ હું તો આવો જ છું..

મારા તરફથી ત્વરિત પ્રતિસાદ મળે કે
એમાં થોડું મોડું થાય..
પણ તું
મનમાં કોઈ જ સંશય વગર,
પૂરી ગતિથી મારી તરફ વહેતી જ રહે
મને ચાહનારા પ્રત્યે હું પૂરેપૂરો વફાદાર છું
એવો વિશ્વાસ રાખજે કારણ,
હું તો આવો જ છું !

જેટલા પણ લોકો મને પ્રેમથી બોલાવે,
સાચા દિલથી પોકારે,
હું એ સર્વેનો છું,
બધામાં વહેંચાયેલો છું.
હું તો આવો જ છું..
સ્વીકારી શકે તો મને સ્વીકાર..
આમ જ
આવી જ રીતે…
હું તારા માટે નહી બદલાઉ.
પણ, તું ધરમૂળથી બદલાઈ જા..
તારો મારા માટેનો માલિકીભાવ
આપણા પ્રેમમાં વચ્ચે આવશે..
પછી અહમ, ઇર્ષ્યા, સરખામણીની ખાઈ મોટી કરશે..
માટે આગમચેતવણી આપું છું તને,
સમજી – વિચારીને જ આ પ્રેમ-પથ પર આગળ વધ..
કારણ..
હું ભલે ગમે તેટલા ટુકડામાં વહેંચાઇને જીવુ
પણ..
મને તો તું અખંડ જ જોઈએ..
કોઈની સાથે
મનથી પણ વહેંચાયેલી ન હોવી જોઇએ
આ બધું સ્વીકાર્ય હોય તો જ તું મારા તરફ વળ.
અને
મને અનહદ પ્રેમ કર !

સ્નેહા પટેલ, અક્ષિતારક
૨-૯-૨૦૧૦.