છોમાસું….ચોમાસું

ચોમાસું આ સાલ છોમાસું થઈ ગયું છે,
એને બહુ પ્રેમ કર્યો તો ભાવ ખાતું થઈ ગયું છે.

ચાર માસે પધરામણીની મજા જ કંઈક અલગ છે,
મહિનાઓની ગણત્રીમાં ભૂલો કરતું થઈ ગયું છે.

કોણ સમજાવે એ અભિમાનનાં પૂતળાને,
ધરતીથી બે વેંત અદ્ધર ચાલતું થઈ ગયું છે.

અમદાવાદ મારું કોરું કટ સુકાય એની રાહમાં,
એનાં રુદનના ભેજની રાહ જોતું થઈ ગયું છે.

અમારી પ્રેમભરી વિનંતીઓથી પલળી જાય તો સારું,
એના વિના જીવન રણનું મ્રુગજળ થઈ ગયું છે….

સ્નેહા-અક્ષિતારક
૨-૦૭-૦૯
૧૦.૧૦ રાતનાં

હવે તો મેઘરાજા પધરામણીકરે તો સારું અમદાવાદમાં…

શું કહો મિત્રો?
ભેગાં થઈને પ્રાથ્ના કરો બધા