સંબંધની માયાજાળ

     

આજે હું બહુ ખુશ છું. મારે તારી સાથે મારી ખુશી વહેંચવી છે. નહીં વહેચું તો મારે મન જાણે એનું કંઈ મૂલ્ય જ નથી..!!મારે તને હું કેટલી ખુશ છું એ બતાવવું છે,સમજાવવું છે, અને ત્યારે જ મારી ખુશી અનુભવવાની લાગણી જાણે કે સાર્થક થાય છે. મારા દુ:ખ તને કહું તો સાવ મોરપીંછ જેવા હલ્કા થઈ જાય છે. બસ, મારે મારા સુખ અને દુ:ખ તારી સાથે વહેંચવા છે.

તારી અને મારી વચ્ચે શું સંબંધ છે? હું તને બહુ પ્રેમ નથી કરતી કે નથી નફરત કરતી…! મને તારા માટે બહુ આસક્તિ નથી કે બહુ વિરક્તતા પણ નથી. એ બધુ હોવું- ના હોવાપણાની,બહુ બહુપણાની લાગણીઓની ભારેખમ અપેક્ષાઓમાં મારે તને જકડવો નથી, બાંધવો નથી.પ્રેમ અને નફરત સિવાયનો જે સંબંધ એ તારો અને મારો સંબંધ.સો ટચના સોના જેવો સંબંધ…!

     આ સંબંધને શું કહેવાય એટલી સમજણ તો મુજ પામરજીવને નથી. પણ હા, એક વાત નક્કી. મારું શાણપણ હું ગમે તેની સાથે વહેંચી શકું છું, પણ મારું પાગલપણ ફક્ત અને ફક્ત તારી જ સાથે…ઓહ..હવે ખ્યાલ આવ્યો.હવે સમજાયું. આ મારો એક માત્ર સંબંધ કે જયાં હું સમજણની બધી હદ ભૂલીને મારું અંગત પાગલપણ તારી સાથે વહેંચી શકું છું..આ તો મારો પાગલપણનો એક માત્ર સંબંધ.

સ્નેહા-અક્ષિતારક,
૫-૭-૨૦૦૯.રાતના ૧૦.૦૦ વાગ્યે.